د ننګرهار د بېلابېلو ولسواليو د شينوارو قوم له مشرانو او مخورو سره لیدنه!
د سرحدونو او قبایلو چارو وزیر محترم محب الله صميم نن جمعه د ننګرهار د شپږو ولسواليو د شينوارو قوم له مشرانو او مخورو سره وکتل.
په دې لیدنه کې چې د ننګرهار په غني خېلو، اچین، نازیانو، دور بابا، سپین غر او هسکې مینې کې مېشتو شينوارو مخورو او مشرانو ګډون درلود، په یاد ولایت کې د ثبات، امن او د سولې د ټينګښت په باب خبرې وشوې.
د شینوارو قومي مشرانو مننه وکړه، چې د سرحدونو او قبایلو چارو وزیر له قومونو سره له نږدې کار کوي دی او د افغانستان د امن او ثبات لپاره هلې ځلې کوي. دوی له خپل لوري ډاډ ورکړ چې د هر ملي پروګرام په تطبیق کې به له دولت سره همکاري کوي.
د سرحدونو او قبایلو چارو وزیر محب الله صمیم په دې غونډه کې وویل، چې شینوارو د افغانستان د ځمکنۍ بشپړتیا د ساتلو او د خاورې د دفاع په خاطر ډېرې قربانۍ ورکړې دي او دولت ورته د قدر په سترګه ګوري.
ښاغلي صمیم زیاته کړه ، چې دی به هڅه وکړي د قومونو ترمنځ اتحاد او اتفاق پیاوړی کړي او له دولت سره یې لا ډېر نږدې کړي چې په دې توګه هېواد ته د ګواښونو او خطرونو مخه ونيسي او شته ستونزې هوارې کړي
