د ولسي جرګې له منشي، د خلکو له استازي او د جنوبي قومونو د یووالي شورا له مشر او یوشمېر ځوانانو سره ناسته!
د سرحدونو او قبایلو چارو وزیر ښاغلي محب الله صمیم نن له غرمې وروسته د ولسي جرګې له منشي ښاغلي اسدالله شهباز، په ولسي جرګه کې د پکتیکا ولایت د خلکو له استاري ښاغلي خالد اسد او د جنوبي قومونو د یووالي شورا له مشر ښاغلي ډاکټر معین څکمني سره د خپل کار په دفتر کې وکتل.
په دې کتنه کې راغلو مشرانو په وار سره د خپلو ستونزو شریکولو ترڅنګ د سرحدونو او قبایلو چارو وزیر یو ولسي او ټولنیز شخص وباله او هیله یې څرګنده کړه، چې ښاغلي صمیم به د قومونو د انسجام، د ولسونو د ستونزو د هوارولو او له نظام څخه ملاتړ ته د خلکو د هڅوولو په برخه کې زیاتې هلې ځلې وکړې.
ورپسې د سرحدونو او قبایلو چار وزیر ښاغلي محب الله صمیم د یادو مشرانو او ځوانانو له راتګ څخه مننه وکړه، په بېلابېلو برخو کې يې د دوې د هلو ځلو او فعالیتونو څخه د ملاتړ په ترڅ کې وویل: خوښ یم، چې تاسو ځوانان د هېواد د آبادې او سوکالۍ لپاره کار کوئ، دا منو، چې په هېواد کې ستونزې شته، هڅه به مو دا وي چې ستونزو ته حل لارې پیدا کړو.
دغه راز ښاغلي صمیم وویل: خویندې هم د هېواد د پرمختګ لپاره کار کوي او د خپلو نارینه وروڼو ترڅنګ یې تل د خپل هېواد د سوکالۍ او هوساینې لپاره منډې ترړې کړي دي، زموږ هڅې به دا وي چې ځوانانو ته د زده کړې مناسب چاپېریال رامنځته کړو.
