د بېلابېلو ولایتونو له قومي مشرانو او مخوور سره کتنه!
د سرحدونو او قبایلو چارو سرپرست او نوماند وزیر ښاغلي محب الله صمیم نن له غرمې مخکې د بادغیس، فراه، نیمروز او هرات ولایتونو له قومي مشرانو او مخورو سره د خپل کار په دفتر کې وکتل.
په دې کتنه کې راغلو مشرانو د خپلو یو لړ سیمه ییزو ستونزو شریکولو ترڅنګ د ملي پروژو د پلي کولو، قومونو د انسجام، سولې او ملي یووالي د ټینګښت او په بېلابېلو ولایتونو کې د نظام په ملاتړ د جرګو جوړولو برخو کې د سرحدونو او قبایلو چارو وزارت د مشرتابه هڅې او لاسته راوړنې وستایلې او د خپلو همکاریو ډاډ یې ورکړ.
ورپسې ښاغلي محب الله صمیم په خپلو خبرو کې د راغلو قومي مشرانو او مخورو ستونزې پر ځای وبللې او د حل په موخه یې ډاډ ورکړ، دغه راز یې د دوی له هېوادني احساس څخه د مننې په ترڅ کې په بېلابېلو ملي مسایلو کې د قومي مشرانو ونډه له ارزښته ډکه یاده کړه او په ګډو هلو ځلو او سلامشور یې ټینګار وکړ.
